அன்னையை வழிபட ஆரம்ப நாட்களில் ஆலயத்தில் 108 மந்திரங்கள், வேண்டுதற்கூறு, சக்தி வழிபாடு போன்றன கூட்டு வழிபாட்டுக்கு பயன்படுத்தப்பட்டு வந்தன. அன்னைக்கு 1008 போற்றி மலர்கள் எழுத வேண்டும் என்ற எண்ணம் ஆலயப்புலவர்கள் ஒருவருக்கு உதிக்க அவர்
அம்முயற்சியில் ஈடுபட்டார்.எந்த சாஸ்திரமும், மந்திரங்களும் தெரியாத அவர் அன்னை விட்ட வழியென சிறுகச் சிறுக இரகசியமாக எழுதி வந்தார். இவர் மந்திரங்களை எழுதிக் கொண்டிருந்த வேளை ஒரு நாள் ஆலயத்திற்குச் சென்றிருந்தார். அன்று அன்னை மந்திரிப்பு நல்கிக் கொண்டிருந்தாள். இவரும் அதில் ஒருவராய்ப் போய் நின்றார். அன்னை இவரை நோக்கி மகனே 1008 போற்றியை விரைவில் முடி என்றாள்.
பரமரகசியமாக இருந்த தம் முயற்சியை அன்னை அறிந்து கொண்டிருக்கிறாள். எனக் கண்ட அப்புலவருக்கோ கரைகாணா ஆனந்தம். இவ்வானந்தத்தோடே மிகுதி மந்திரங்களையும் எழுதி முடித்து அன்னையின் திருவடியில் சமர்ப்பிக்க அன்னையவள் மற்றொரு புலவரையும் அழைத்து “இதில் திருத்தங்கள் சில செய்ய வேண்டியுள்ளது. இருவரும் சேர்ந்து திருத்தங்கள் செய்து எடுத்து வாருங்கள்” என்றாள்.
எல்லையிலாக் கருணையோடு மானிட குலத்தை உய்விக்க வேண்டி அவதார நோக்கம் கொண்டு வந்த அன்னை நாத்திகம் பேசிய இரண்டு பிள்ளைகளைத் தன் காலடியில் இழுத்துப் போட்டுக் கொண்டு அவர்கள் கைகளாலேயே மந்திரங்கள் எழுத வைத்து, அதற்கான காப்புச் செய்யுளாகத் தன் திருவாயாலேயே வெளியிட்ட மந்திரம் தான் இந்த மூல மந்திரம்!
“ஓம் சக்தியே பராசக்தியே
ஓம் சக்தியே ஆதிபராசக்தியே
ஓம் சக்தியே மருவூர் அரசியே
ஓம் சக்தியே ஓம் விநாயகா
ஓம் சக்தியே ஓம் காமாட்சியே
ஓம் சக்தியே ஓம் பங்காரு காமாட்சியே”
காப்புச் செய்யுளாக மூல மந்திரத்தை அருளிய அன்னை ஓம் பங்காரு காமாட்சியே! என்ற மந்திரத்திற்கு விளக்கம் அளித்தாள். ஆதியில் தான் காஞ்சியில் காமாட்சியாக இருந்ததையும் பாதியில் தான் பங்காரு காமாட்சியாகத் தஞ்சையில் எழுந்தருளிய குறிப்பையும் அன்று புலப்படுத்தினாள்.
அன்னையை வழிபட வேண்டுதற்கூறு, 108 போற்றி உரு பாடல்களே இருந்தன. அதன் பின் அம்மா 1008 மந்திரங்களை இயற்ற வைத்தாள்.
அன்னையவள் அருளிய மந்திரங்களுள் விசேட மந்திரங்களாக 1008 போற்றி மலர்களும், 1008 போற்றித் திருவுருவும் கருதப்படுகின்றன.
“1008 போற்றி மலர்களை செவ்வாய்க்கிழமை வழிபாட்டுக்கு வைத்துக்கொள்!”
1008 போற்றித் திருவுருவைப் படிக்கிறவர்களை சந்நிதியின் முன்பாக வடதிசை நோக்கி அமர வைத்தாள். 1008 போற்றி மலர் படிப்பவர்களைத் தென் திசை நோக்கி அமர வைத்தாள்.
அன்னை அருளிய மந்திரம் படிக்கும் போது கடைப்பிடிக்கவேண்டிய விதிமுறைகள்:
1. ஒவ்வொரு வரிசையிலும் ஒற்றைபடையில் எண்கள் வருமாறு தொண்டர்கள் அமர வேண்டும்.
2. ஒருவர் உடம்பு மற்றொருவர் உடம்பின் மேல் படாதவாறு இடைவெளியிட்டு அமர்தல் வேண்டும்.
3. மந்திரம் படிக்கும் போது முதுகு வளையாமல் உடம்பு ஆடாமல் நிமிர்ந்து உட்கார்ந்தபடி மந்திரம் படிக்க வேண்டும். உடம்பில் எந்தச் சேட்டையும் கூடாது.
4. மந்திர வழிபாட்டுக்கு அனைவரும் அமர்ந்ததும்., அன்னைக்குக் கற்பூர தீபாராதனை காட்டிப் பின்பு மந்திர வழிபாட்டில் கலந்து கொண்டுள்ளவர்களுக்கு தீபாராதனை காட்டி அவர்களைச் சுற்றி வந்து தீபாராதனை செய்து, அவர்களுக்கும் எலுமிச்சம் பழம் பிழிந்து திருஷ்டி கழிக்க வேண்டும்.
5. மூல மந்திரத்தோடு 1008 மந்திரங்களைத் தொடங்க வேண்டும். பின் 108 சொல்லி முடிக்க வேண்டும்.
6. ஒவ்வொரு மந்திரமும் சொல்லி முடிக்கும் போது ‘ஓம்’ என்ற பிரணவ ஒலியுடன் கையால் அடிக்கும் மணியின் ஒலியும் இணைந்து முடிய வேண்டும்.
7. ஆயிரம் மந்திரம் வந்ததும் பிரம்மதாளம், மணி ஒலி, மிகுந்த முழக்கத்துடன் ஒலிக்கப்படவேண்டும்.
8. 1008 மந்திரங்களும் சொல்லி முடித்த பிறகு 108 மந்திரம் சொல்ல வேண்டும்.
9. 1008 மந்திரங்கள் சொல்லி வழிபாடு நடக்கிற நேரத்தில் மந்திரம் படிக்கிற சிலருக்குத் தொண்டை கம்மிக் கொள்ளலாம். மந்திர வழிபாட்டில் தொய்வு ஏற்படலாம்.அப்படிப்பட்ட நேரங்களில் பூசனிக்காய் திருஷ்டி கழிக்க வேண்டும். இல்லையேல் எலுமிச்சம் பழம் பிழிந்து திருஷ்டி கழிக்க வேண்டும்.
11. மந்திரம் படிக்கிறபோது உனக்கு மூக்குக் கண்ணாடி எதற்கு? கைகளில் மோதிரம் எதற்கு? என்று சிலரை அன்னை கேட்பது உண்டு. பார்வையில் பழுதுள்ளவர்கள் எழுத்து தெரியாதவர்கள் எப்படிப் படிப்பது என்று கேட்கலாம். அத்தகையவர்கள் வேறு வழியில்லாத நிலையில் மூக்குக் கண்ணாடி அணியலாம்.
அம்மா காட்டும் பாதையில் அனுதினமும் அன்னையின் “1008, 108 மந்திரங்களை தினமும் படித்து வழிபட்டு அம்மாவின் அருளைப் பெறுவோமாக!”
ஓம் சக்தி அம்மாவே சரணம் அம்மா!
உலகமெலாம் சக்திநெறி ஓங்க வேண்டும்!!
ஒவ்வொருவர் மனக்குறையும் நீங்க வேண்டும்!!
ஓம் சக்தி
நன்றி
ஆதாரம்:சக்தி ஒளி செப்டம்பர்- 2010
]]>
இந்த இணையதளம் மிகவும் பயனாக உள்ளது